မဲခေါင်-လန်ချန်း ပူးပေါင်းဆောင်ရွက်မှု ရက်သတ္တပတ် လှုပ်ရှားမှုအဖြစ် ကျင်းပသည့် ချစ်ကြည်ရေးကြက်တောင်ရိုက်ပြိုင်ပွဲအခမ်းအနားသို့ မြန်မာသံအမတ်ကြီး တက်ရောက်

ကမ္ဘောဒီးယားနိုင်ငံဆိုင်ရာ မြန်မာသံအမတ်ကြီး ဦးကျော်စိုးမင်းသည် ၁၉-၃-၂၀၂၄ ရက်နေ့တွင် Phnom Penh Badminton Club ၌ ၂၀၂၄ ခုနှစ်၊ မဲခေါင်-လန်ချန်း ပူးပေါင်းဆောင်ရွက်မှု ရက်သတ္တပတ် လှုပ်ရှားမှုအဖြစ် ကျင်းပသည့် ချစ်ကြည်ရေး ကြက်တောင်ရိုက်ပြိုင်ပွဲ အခမ်းအနားသို့ တက်ရောက်ခဲ့ပါသည်။
ပြိုင်ပွဲအခမ်းအနားသို့ မဲခေါင်-လန်ချန်း ပူးပေါင်း ဆောင်ရွက်မှုအဖွဲ့ဝင်နိုင်ငံများမှ သံအမတ်ကြီးများနှင့် သံတမန်များ၊ ကမ္ဘောဒီးယားလူငယ်အစည်းအရုံးအဖွဲ့ချုပ်မှ တာဝန်ရှိသူများနှင့် လူငယ်အဖွဲ့ဝင်များ ပါဝင်တက်ရောက်ခဲ့ကြပါသည်။
အခမ်းအနားအစီအစဉ်အရ မဲခေါင်-လန်ချန်း ပူးပေါင်းဆောင်ရွက်မှု မှတ်တမ်းဗီဒီယိုကို ပြသခဲ့ပြီး ကမ္ဘောဒီးယားနိုင်ငံ၊ နိုင်ငံခြားရေးနှင့် အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန၊ ဒုတိယဝန်ကြီး H.E. Meas Kim Heng နှင့် ကမ္ဘောဒီးယားနိုင်ငံဆိုင်ရာ တရုတ်သံအမတ်ကြီး H.E. Wang Wentian တို့က အမှာ စကားအသီးသီး ပြောကြားခဲ့ကြပြီး ကိုယ်စားပြု အားကစားသမားများက ချစ်ကြည်ရင်းနှီးစွာ ပါဝင်ယှဉ်ပြိုင်ကစားခဲ့ကြောင်း သိရှိရပါသည်။